امتحان مشترک سال ۱۴۴۵ دوره های عالمیه، عالیه و خامسه علمای کرام مدارس خصوصی در ولایت فاریاب
یوم جمعه مورخ ۷ رجب المرجب ۱۴۴۵ه. ق. برابر با ۲۹جدی ۱۴۰۲ خورشیدی، جلسه راهنمایی برای ممتحنین دوره های خامسه، عالیه و عالمیه در سالون تکنولوژی معلوماتی پوهنتون فاریاب با حضور محترم مفتی صاحب عبدالمبین، نگران اعلی جامعات و تخصصات و هیآت معیتی شان، محترم شیخ محمد نبی غفوری مهتمم دارالعلوم امام ابوحنیفه رح، مولوی صاحب سید حفیظ الله معتصم بالله، رییس معارف فاریاب، مفتی صاحب محمد نصیر معاون تعلیمات اسلامی ریاست معارف، شیخ صاحب حیات الله حلیم، رییس شورای علما، مولوی صاحب محمد محق، رییس پوهنتون فاریاب، معاونین پوهنتون، رؤسای پوهنحی ها، شیوخ و علمای کرام، استادان و مهمانان گرامی، برگزار گردید.
نشست یاد شده، با تلاوت آياتی چند از قرآن کریم توسط محترم حافظ سید بهاء الدین انصاری، رییس پوهنحی ادبیات و علوم بشری آغاز و متعاقبا محترم پوهنیار حبیب الله ادیب معاون امور محصلان پوهنتون فاریاب، به نماینده گی از این نهاد، با خوش آمد گویی به مهمانان عالیقدر، وعدۀ همکاری در راستای برگزاری هرچه بهتر این امتحان را سپرد؛ همچنان در ادامه محترم شیخ محمد نبی غفوری مهتمم دارالعلوم امام ابوحنیفه رح، مفتی صاحب عبدالمبین، نگران اعلی جامعات و تخصصات، مفتی صاحب محمد نصیر معاون تعلیمات اسلامی ریاست معارف، ضمن سخنان رهنمودی و عالمانه شان، بر شفافیت امتحانی که قرار است، یک هفته (شنبه ۸ رجب الی پنجشنبه ۱۳ رجب سال جاری) در سه محل (لیسه خراسان، لیسه عربخانه و پوهنتون فاریاب) ادامه داشته باشد و در آن (۳۷۶۴) نفر از طلاب و علمای عظام در درجه‌های مختلف علوم دینی اشتراک خواهند داشت، تأکید نمودند.
نشست مذکور با دعای خیر محترم شیخ صاحب حیات الله حلیم، رییس شورای علمای ولایت فاریاب، اختتام یافت.
